12e édition du Mois du créole, Kréyòl an mouvman: Annou ba lang é kilti an-nou on bèl balan
Davwa nou adan mwa òktòb, ka touvé-y sé Mwa kréyòl, Konsèy dépatmantal–la ka owganizé Kréyòl an mouvman.
Aprédavwa manifestasyon-lasa rété dotwa lanné pa ka bay-adan, mi i ka viré adan lanlmannak a tè-natif an-nou, é mi divès pwogràm i ka pwopozé :
Jous pou rivé 26 a mwa òktòb-la, kolèktivité dépatmantal-la ké métanwout plizyè aktivité asi tout bik a patrimwàn an-nou, mé pa konpwanndi sé anni sa.
Anpanmi sé moman-la, nou pé nonmé sé pli fò-la :
• Lèwlouz, on èspèktak ka mélé plizyè kalité mizik, plizyè kalité dans èvè tout tim-tim bwa-sèk ola tini Krisyan LAVISO, Mark PANDOLF, Valéri MORAND, Soni TROUPE èvè Géra DELVER, pou ay gadé sanmdi 12 òktòb a 6 zè é dimi oswè, adan fò Fleur d’épée, o Gozyé.
• Mèwkrédi 16 òktòb a 3 zè-d-laprémidi, adan sant kiltirèl Gérard-Lockel, Bémao Ektò POULLET, Michèl MELANGE, Korinn FAMIBELLE, Fiwmen THEOPHILE ké sizé alantou a on tab pou yo diskité asi ka « Kréyòl-lékòl » ka siyifyé pou yo, (ki règlèman, ki zouti, ki mwayen, pou rivé ola).
• Jédi 24 òktòb a 6 zè é dimi oswè, Goubè, adan sé Awchiv dépatmantal-la, ké tini on konférans asi « Fè moun apwann Kréyòl » sa ké fèt èvè soutyen a Sosyété Istwa Gwadloup é sé Miwma BOLUS ké gidonné konférans-lasa.
• Gran ripaj : dikté kréyòl-la, ké fèt èvè koulmen a asosyasyon Lang Kréyòl Gwadloup an Bannzil, èvè soutyen a bibiyotèk é médyatèk a bannzil-la. Ké ni on prèmyé éliminasyon sanmdi 19 òktòb adan bibiyotèk é médyatèk : Zabim, Kapèstè Marigalant, Granbou, Moul, Tibou, Lézad-Tibou, Twarivyè, Zabitan, Lapwent épi Gozyé. Final-la ké fèt sanmdi 26 òktòb, o Gozyé.
Pannan sé dotwa jou-lasa, nou ké viv èvè lonnè é respé ba lang é kilti kréyòl.
Programme complet:
https://www.cg971.fr/evenement/kreyol-an-mouvman-2024
